ما تركت الصافرة هروباً… تركتها لأكون أقرب للعبة ؟

نقر الصورة لتكبيرها

ناصر قواص
سؤال: من هو أحمد وفيق قواص بعيداً عن العناوين؟
أنا إبن كرة القدم. اشتغلت بالتحكيم داخل الاتحاد اللبناني، وعشت تفاصيل المباراة من أصعب موقع… المكان اللي الكل بيحاسبك فيه.

سؤال: لماذا تركت لجنة الحكام؟
القرار ما كان لحظة، كان قناعة. حسّيت إنه في مرحلة لازم تتغيّر، وأني قادر أعطي أكتر خارج التحكيم، مش بس بقرار خلال 90 دقيقة، بل ببناء لاعب لمستقبل كامل.

سؤال: هل كان القرار سهل؟
أبداً. التحكيم مدرسة قاسية، وتركه مش سهل، خصوصاً بلوغك للعالمية من بوابة الحكم الدولي، بس الجرأة إنك تعرف إمتى تغيّر طريقك.

سؤال: كيف جاءت فرصة النجمة؟
إجت بثقة متبادلة. نادي النجمة اسم كبير، ولما بيجي عرض من نادي بهالحجم، لازم توقف عنده بجدية.

سؤال: هل تلقيت عروضاً من أندية أخرى؟
كانت في اتصالات واهتمام، لكن العرض الأكثر جدية ووضوح كان من النجمة، وهيدا اللي خلاني آخد قراري.

سؤال: ما كان دورك داخل الفريق؟
في الثلاث السنوات الماضية، كنت مدير عام للفئات العمرية بالنادي. شغلي يومي، من تنظيم الفريق لمتابعة اللاعبين والتنسيق مع الجهاز الفني… تفاصيل صغيرة بتصنع فريق كبير.

سؤال: ماذا عن الرواتب في هذا المجال؟
بصراحة، الرواتب بالفئات العمرية محدودة، وما بتوازي حجم التعب. بس اللي بيكفّي هو الشغف والإيمان باللي عم تعمله.

سؤال: ما أصعب ما تواجهه اليوم؟
إنك تبني لاعب صح، مش بس تربح مباراة. بدك تشتغل على العقل، الانضباط، والالتزام، بظل ظروف مش دايماً بتساعد.

سؤال: ماذا تغيّر فيك بعد هذه الخطوة؟
اختلفت الخبرة، من حكم دولي إلى مراقب إلى إداري كبير في نادي كبير، الأمر الذي جعلني أتمكن من تركيب أضلاع المثلث الكروي بٱمتياز. صرت أقرب للعبة بطريقة أعمق. كنت عم شارك بصناعة حكم ثم لاعب، فضلاً عن مراقبة المباريات بفئات عديدة وبكافة الدرجات.

السؤال : إنت اليوم بالرياضة وين؟
موظف بقسم الرياضة بجامعة بيروت العربية، وبصدد مشروع تطوير حكم كرة الصالات والشاطئ.
الخلاصة:

“التحكيم علّمني أكون عادل… واليوم عم جرّب أكون مؤثّر.”
أحمد وفيق قواص… من رجل قرار في لحظة، إلى صانع طريق لجيل كامل.